افغانستان

ارګ د حزب اسلامي سره د سولې تړون نهايي کړ

نن ټکی اسیا (یکشنبه، غويي ۲۶مه ۱۳۹۵ل): د ګډ حکومت او حزب اسلامي تر منځ د سولې تړون نن په ارګ کې نهايي شو.

حزب اسلامي ته نېږدې سرچېنې وايي چې د حکومت او حزب اسلامي د استازو تر منځ تړون نن په ولسمشرۍ ماڼۍ کې نهايي شو. دغو سرچېنو دا نه ده څرګنده کړې چې یاد تړون د سولې د عالي شورا که د اشرف غني لخوا لاسلیک شو.

د حزب اسلامي یو تن لوړپوړي مشر خالد فاروقي ته منسوبې فیسبوک پاڼې هم تایید کړې چې د حکومت او حزب اسلامي تر منځ د سولې تړون نن په ارګ کې نن یکشنبه نهايي شوی.

سرچېنې زیاته کړې چې یاد تړون به د حزب اسلامي امیر [ګلبدین حکمتیار] ته د موافقې او لاسلیک لپاره وړاندې کیږي.

تر دې دمه (۰۷:۱۰ ماښام کابل وخت) ګډحکومت رسما په دې اړه څه نه دي ویلي.

تر دې وړاندې د سولې عالي شورا مرستیال او د حزب اسلامي مرکچي خبر ورکړی و چې د حزب اسلامي سره د سولې تړون به ولسمشر ته د منظورۍ لپاره واستول شي.

د سولې د دغه ۲۵ ماده لرونکي تړون له مخې به حزب اسلامي د ګډحکومت سره جګړه پای ته رسوي، اساسي قانون به مني او د القاعده په شمول به له جهادي ډلو سره اړیکې پرې کوي.

په مقابل کې به ګډ حکومت د حزب اسلامي جنګیالي بخښي، ټول بندیان به یې له زندانونو
خوشې کوي، کابل کې به ورته دفترونه او د اوسېدو ځایونه ورکوي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x