شعـــــرونه

ډیلیټ (Delete)/ الحاج پيرمحمد کاروان

الحاج پيرمحمد کاروان

په تليفون کې چې د A جدول راوړومه
نو ستا نامه په کې اول راوځي
سترګو ته دوه څاڅکي د اوښکو راځي
له زړه مې سل چينې د ګل راوځي
د تليفون تڼۍ مې کيکاږله
زما اواز تر تا در ورسيدو
تا يې پر ستوني باندې پښه کېښوده
زما په زړه کې دې تېره ماته ښيښه کېښوده
ما درته څومره سلامونه وکړل
خو تا يوځلې هم عليک ونه وې
په مرحبا مرحبا ستړی شومه
جانانه تا راته لبيک و نه وې
په تليفون کې مې چارج ختم کرېډېټ تمام شو
لکه شاهين پنجو کې وړی کوتر
سور مې د زړه په وينو سپين سلام شو
د کمپيوترتر څنګه کېناستمه
په MSN کې مې ONELINE وليدې
نو مې يو سور ګلاب دروليږلو
ما وې چې ته مې ګوندې هم په سره ګلاب وولې
خو تا د سره ګلاب د پاسه چليپا را ښکله
تېره چاړه وه پر مرۍ چې تا زما را ښکله
ما وې په وينو سور يو بل ګلاب در وليږمه
خو ته OFFLINE ښکاريدې BLOCK دې ومه
د EMAIL پاڼه مې راواړوله
ستا راليږلي اېمېلمونه له الف نه تر يا
ما په يوه ستړي نظر ټول و کتل
په کې يو څاڅکی د شبنم نه وو خوشبو يې نه وه
جوړ له کاغذ مې دا غاټول و کتل
ټول د درواغو له داغونو ډک وو
له پاڼې پاڼې يې ريا وريده
نه ترې وږمې د صداقت راوتې
نه ترې نه يو ټکی رڼا ورېده
لکه پېريان چې د غوسې واخلي ماشوم په غېږ کې
ګوډۍ نانځکې او د لوبو شيان
په ديوالونو وولي
داسې مې ستا د اېمېلونو کاغذي ګلونه
له ډېره قهره پاڼې پاڼې ايسته و غورځول
په MSN کې مې ستا نوم DELETE کړ
له تليفون مې ستا نومره و ايسته
اوس نو يو دوه کارونه پاتې راته
بری به هغه وخت نصيب وي ځما
که مې له خيال نه ستا څېره و ايسته
که مې په زړه کې ستا راټول يادونه
د خواږه صبر په اوبو و مينځل
دا څه موده په رياضت يمه بوخت
چې دې له خيال نه او له زړه نه په يو ځای وباسم
بيا به نو زر توبې توبې له مينې
په پاک دربار کې د لوی خدای وباسم
خو نتيجه صفر ده
نه کيږي نه کيږي والله نه کيږي
په زړه مې ووري او په خيال کې مې چکرې وهې
اخر په دې مې امنا کړې ده
په کومه ورځ مې چې په ګورکې کېږدي
د ګور چينجي به راشي
ستا ټول يادونه به DELETE کاندي زما په زړه کې

پیر محمد کاروان

ورته لیکنې

ګډون وکړئ
خبرتیا غوښتل د
guest
1 Comment
زړو
نویو ډیرو خوښو شویو
Inline Feedbacks
ټولې تبصرې کتل
غوربندی

کاروان صیب دا انلاین مینه دیره سخته وی

په هر حال د یوی ملاحظی اجازه که وی نو دا کریدیت خو په داسي تلفون چی په زره کاپیره معشوقه یی نه جوابوی نه خلاصیژی

Back to top button
1
0
Would love your thoughts, please comment.x
()
x