نن ټکی اسیا

اشرف غني له صلاح الدین رباني د استعفا غوښتتنه کړې

نن ټکی اسیا (چهارشنبه، غبرګولي ۱۲مه، ۱۳۹۵ل): وروسته له هغه چې د بهرنیو چارو وزیر صلاح الدین رباني د حکومت پر دواړو شریکانو نیوکې وکړي، ولسمشر غني ترې د استعفا غوښتنه کړې ده.

له ګلخانې ماڼۍ نه ځینې سرچینو رسنیو ته ويلي چې اشرف غني تېره شپه صلاح الدین رباني سره اړیکه نیولې او ترې غوښتي يې دي چې له خپلې دندې لاس پر سر شي.

وړاندې تر دې چې د کورنیو چارو پخوانی وزیر نورالحق علومي له دندې لرې کړل شو، صلاح الدین رباني هم په هغه لیست کې و، چې باید له دندې وشړل شي.

هغه مهال هم په شخصي رسنیزو ناستو کې صلاح الدین رباني د حکومت دواړو مشرانو ته ګواښ کړی و، چې د نوموړي له دندې لرې کېدو خیالونه دي له سرونو وباسي.

صلاح الدین رباني چې له خپل پلار برهان الدین رباني وروسته د جمعیت اسلامي مشري هم ور په غاړه ده، څو ورځې وړاندې مزار کې خپل ګوندیانو ته د حکومت پر ناکامۍ اعتراف وکړ.

نوموړي د جمعیت په غونډه کې وویل چې د حکومت دواړه شریک مشران د خپل شراکت له شوې موافقې هم څو ځلې سر غړولی دی.

ولسمشر غني د هغه څرګندونې غیر مسوولانه بللې او تازه راپورونه ښيي چې له نوموړي يې د استعفا غوښتنه کړې، خو نه ده څرګنده چې رباني به ورته د هو سر وخوځوي او که به د نه ځواب ورکړي.