تر ټولو اوږدې او لنډې روژې به په کومو هېوادونو کې وي

نن ټکی اسیا ( يکشنبه، غبرګولي ۱۶مه ۱۳۹۵ل): په اسلامي نړۍ کې د رمضان المبارک مياشت کېدای شي سبا دوشنبه پيل شي، په افغانستان او پاکستان کې به د روژې وخت شاوخوا شپاړل ساعته وي.

تر ټولو اوږده روژه به په کومو هېوادونو کې وي؟

د دې ځواب يو څه هېښوونکی دی، هغه دا چې تر ټولو اوږده روژه د اروپا په ايس لينډ هېواد کې ده، چې هلته به د روژې اوږدوالی ۲۲ ساعته وي، له ايس لينډ وروسته سويډن کې ۲۱ ساعته او ۵۸ دقيقې دی. ورپسې ناروې ده، چې شل ساعته او ۴۵ دقيقې به وي، په ډنمارک ۲۰ ساعته او ۲۱ دقيقې او هالينډ کې د روژې وخت ۱۹ ساعته او ۸ دقيقې وخت لري.

تر ټولو لنډې روژې په کومو هېوادونو کې دي؟

تر ټولو لنډې روژې به د منځنۍ امريکا چلي هېواد کې وي، چې ټول ټال به ۱۱ ساعته او دېرش دقيقې وي. ورپسې سويلي افريقا ده، چې هلته به د روژې دوران ۱۲ ساعته او شپږ دقيقې وي. ارجنټاين کې به ۱۲ ساعته او ۲۱ دقيقې وي او په اسټراليا کې به ۱۲ ساعته او ۳۸ دقيقې وي.

له ۱۶ تر اتلس ساعته روژې به په کومو هېوادونو کې وي.

افغانستان او پاکستان په هغو هېوادونو کې راځي، چې روژه به په کې شاخوا شپاړس ساعته وي، هند کې به ۱۷ ساعته ۱۱ دقيقې وي، مراکش کې ۱۷ ساعته ۱۲ دقيقې، ميکسيکو کې  ۱۷ساعته، اردن کې ۱۷ ساعته ۳۱ دقيقې، لبنان کې ۱۷ ساعته او ۳۰ دقيقې، ايران کې ۱۶ ساعته او ۱۹ دقيقې، مصر کې ۱۶ ساعته او ۶ دقيقې، فلسطين کې ۱۷ ساعته ۳۹ دقيقې او په امريکا کې ۱۶ ساعته او ۴۴ دقيقې دی.

په ډېری اروپايي هېوادونو کې د روژې وخت لږ تر لږه اتلس ساعته دی.

هغه هېوادونه، چې لمر په کې نه ډوبيږي، مسلمانان به هلته څنګه روژه ماتی کوي؟

د امريکا په الاسکا جوناو سيمه کې لمر له نيمې شپې وروسته اسمان کې راڅرګنديږي، د دغې سيمې خلک به روژه ماتی څنګه کوي؟ يا د فن لينډ په شمالي سيمو کې، چې نږدې دوه مياشتې په کې لمر نه ډوبيږي.

يو شمېر علماوو تېر کال فتوا ورکړې وه، چې ځايي مسلمانان بايد د کوم ګاونډي هېواد د لمر خاته او غروب په تقليد روژه ماتی او پېشلمی وکړي. د ناروې اسلامي څېړنو مرکز خپلو خلکو ته ويلي و، که د روژې وخت له ۲۰ ساعته ډېر شي، نو خلک کولای شي، چې د مکې مکرمې له وخت سره سم روژه ماتی او پيشلمی وکړي.