روژه د تاریخ په پاڼو کې

د روژې دوولسمه ورځ د تاریخ پاڼو کي

لیکوال: شفیق احمد ریان
بسم الله والحمدالله

په مدینه منوره کي مهاجرو او انصارو ترمنځ د ورورګلوي بنسټ ایښودل :

د روژې په ۱۲ ورځ د هجرت په لومړي کال رسول الله صلی الله علیه وسلم د خپلو مهاجرو او انصارو صحابه کرامو تر منځ د ورور ګلوي بنسټ کیښود. ددې لامل دا وو چي کله له مکې مکرمې  څخه مسلمانانو مدینې منورې ته هجرت وکړ اکثره یي تش لاس راغلی وو نه یي کومه توښه لرله او نه يې هم د اوسیدلو ځایونه، رسول الله صلی الله علیه وسلم له لوري د مهاجرو او انصارو تر منځ د ورور ګلوي د بنسټ په ایښودلو سره د مهاجرو مشکلات تر ډیره حده حل شول.

د دوهم ځل لپاره د عباسي خلافت قیام:

د روژې په ۱۲ ورځ په ۳۳۱ هـ ق کال کې چې  د ۹۴۳ میلادي کال د مئ د میاشتي له نهمي نیټې سره سمون خوري سردار ناصر الدوله بن حمدان بغداد ته داخل شو او د عباسي خلافت د دوهم ځل قیام اعلان يي وکړ.

د امام جوزي رحمة الله علیه وفات :

د روژې په ۱۲ ورځ چي د ۱۲۰۰ میلادي کال د جولای د میاشتي له شپاړسمي نیټې سره سمون خوري ستر عالم، محدث او فقیه امام ابوالفرج الجوزي رحمة الله علیه وفات شو، نوموړي تر ۳۰۰ زیات کتابونه لیکلي وو چي د هغو له جملي څخه يي المنتظم في تاریخ الملوک والامم، صفو الصفوة او اخبار الاذکیاء ډير مشهور دي.

د انطاکیه فتحه :

د روژې په ۱۲ ورځ په ۶۶۶ هـ ق کال کي چي د  ۱۲۶۸ میلادي کال د مي د میاشتي له ۲۵ تاریخ سره سمون خوري د امیرظاهر ببریس په مشري مجاهدین وتوانیدل چي د انطاکیه ښار د عیسایانو له منګلو څخه ازاد کړي .

د قاضي محمد بن عثمان بساطي وفات :

د روژې په ۱۲ ورځ په ۸۴۲ هجري کال کي مشهور دیني عالم، فقیه او شاعر محمد بن عثمان بساطي چي په قاضي القضات سره مشهور وو وفات شو، نوموړی په فقه، اصول فقه، بیان او عربي ادب کي زیات علم درلود، مشهور کتابونه يې  المغني او  شفاءالغلیل علی مختصرالشیخ خلیل دي.

په تایلنډ کي د مظلومو مسلمانانو شهادت:

د روژې په ۱۲ ورځ په ۱۴۲۵ هـ ق کال کي چي د ۲۰۰۴  میلادي کال د اکتوبر د میاشتي له ۲۶ تاریخ سره سمون خوري د تایلنډ د ناراثیوات د علاقي مسلمانونانو د څو تنو نیول شويو مسلمانو ځوانانو د خلاصون لپاره سولیزه مظاهره وکړله، پولیسو په وحشیانه ډول په دوی یرغل وروړ ۸۷ کسان یي په شهادت ورسول او ګڼ شمیر نور يي ټپيان کړل. د تایلند مسلمانان په دي هیواد کي اقلیت دي اکثره وخت ددي هیواد د حکومت له لوري ځورول کیږي.

ورته لیکنې

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx