روژه د تاریخ په پاڼو کې

د روژې اوولسمه ورځ د تاریخ پاڼو کي

لیکوال: شفیق احمد ریان

بسم الله والحمدالله!

۱د بدر الکبری غزا :

د روژي په ۱۷ ورځ په ۲ هـ ق کال کي چي د ۶۲۳ میلادي کال د مارچ د میاشتي له ۱۳ تاریخ سره سمون خوري د رسول الله صلی الله علیه وسلم په مشري د مسلمانانو او د مکي د مشرکینو تر منځ جګړه وشوه، دي تاریخ جوړونکي او سرنوشت ټاکونکي غزا کي مسلمانانو سوبه وکړه د مکي مشرکین چي شمیر يي تر مسلمانانو ۳ چنده زیات وو شرمونکي ماتي وخوړله، د اسلام د سرسخت دښمن ابوجهل، امیه بن خلف او عتبه په ګډون د کفارو لوي لوي سرداران دي غزا کي ووژل شول، د بدر غزا چي د فرقان په نوم هم یادیږي د کفر او اسلام تر منځ لومړنۍ جګړه وه.

د رسول الله صلی الله علیه وسلم د لور رقیه رضي الله تعالی عنها وفات :

د روژي په ۱۷ ورځ په ۲ هجري کال کي چي د ۶۲۳ میلادي کال د مارچ د میاشتي له ۱۳مي نیټې سره سمون خوري د رسول الله صلی الله علیه وسلم لور او د امیرالمؤمنین حضرت عثمان بن عفان رضي الله تعالی عنه میرمن حضرت رقیه رضي الله تعالی عنه وفات شوه، حضرت عثمان رضي الله تعالی د بدر د غزا لپاره پوره تیاری کړي وو، دا چي میرمن يي حضرت رقیه رضي الله تعالی عنها سخته ناروغه وه د رسول الله صلی الله علیه وسلم په امر د هغي د خدمت لپاره مدینه کي پاتي شو، رسول الله صلی الله علیه  وسلم د بدر د غزا په نیول شویو غنیمتونو کي نوموړي ته هم برخه ورکړله، د حضرت رقیه رضي الله تعالی عنها له وفات څخه وروسته رسول الله صلی الله علیه  وسلم خپله بله لور ام کلثوم رضي الله تعالی عنها حضرت عثمان رضي الله تعالی عنه ته په نکاح کړله له همدي امله د ذوالنورین په لقب سره هم یادیږي.

د ام المؤمنین حضرت عائشي رضي الله تعالی عنه وفات :

د روژي په ۱۷ ورځ په ۵۸ هجري کال کي چي د ۶۷۸ میلادي کال د جولای د میاشتي له ۱۲مي نیټې سره سمون خوري د رسول الله صلی الله علیه وسلم میرمن او د حضرت ابوبکر صدیق رضی الله تعالی عنه لور ام المؤمنین حضرت عایشه رضي الله تعالی عنها د ۶۷ کلونو په عمر د حضرت معاویه بن ابي سفیان رضي الله تعالی عنه د واکمني په مهال  وفات شوه، د نوموړې له وصیت سره سم په جنت البقیع کي د شپي مهال خاورو ته وسپارل شوه .

د عموریه تاریخي جګړه او د بیزانیس د عیسویانو ماتي:

د روژي په ۱۷ ورځ په ۲۲۳هـ ق کال چي د ۸۳۸ میلادي کال د اګست د میاشتي له ۱۲ تاریخ سره سمون خوري د عباسي خلیفه معتصم په مشري مسلمانانو د بیزانس عیسوي حکومت ته درنه ماتي ورکړله، تاریخ کي راغلي دي چي عیسویانو دهغه ځای په مسلمانانو ډير ظلمونه کول، یوه ورځ يي یوه مسلمانه  میرمن شکنجه کوله چي د نوموړي له خولي څخه د واه معتصماء چیغه ووتله، دا خبره چي د معتصم غوږو ته ورسیدله، له خپل ځایه پاڅید او وویل : لبیک، په رب مي دي قسم وي چي تاسو به وژغورم، نوموړي سمدستي یو قوي لښکر تیار کړ او د بیزانس د عیسوي واکمني جرړي يي ویستلي .

د مصر له حکومت څخه د سلطان رکن الدین بیبرس لري کیدل :

د روژي په ۱۷ ورځ په ۷۰۹ هـ ق کال کي چي د ۱۳۱۰ میلادي کال د فبروري د میاشتي له ۱۷ تاریخ سره سمون خوري د مملکو مشهور باچاه سلطان بیبرس له یونیم کال حکومت  وروسته له واکمني څخه ګوښه شو، نوموړي د اسلامي نړۍ د یو والي لپاره ډيري هڅي وکړي او اسلامي امت ته يي زریني کارنامي تر شا پریښودلي . سلطان بیبرس د عین الجالوت په جګړه کي  له سلطان سیف الدین قطز سره یو ځای د مغلو ستر لښکر ته ماتي ورکړه، په دي توګه يي د مغلو د طوفان او فتوحاتو مخه ډب کړه. د عین الجالوت له جګړي وروسته اسلامي نړۍ د ارام ساه وکاږله او د مغلو د استبدادي واکمني زوال پیل شو.

سلطان رکن الدین بیبرس د عین الجالوت له جګړي وروسته له صلیبیانو سره هم درني جګړي وکړلي، د نوموړي لښکر کشیوو په هغه وخت کي د صلیبیانو او مغلو د مخنیوي لپاره د اسلامي نړۍ لپاره ډیري ګټولي ثابتي شولي.

سلطان ظاهر بیبرس د مسلمانانو د هوسایني او ابادي لپاره ګڼ شمیر کارونه سرته ورسول، د مصر په مختلفو سیمو کي يي مسجدونه، پلونه، نهرونه او لويي لاري جوړي کړلي.

همدا رنګه د نوموړي د حکومت په وخت کي د جنګي کښتیو، جنګي وسلو او لاسي بمونو جوړولو ته زیات توجه وشوه، د مورخینو له قوله د عین الجالوت په جګړه مسلمانانو په لومړي ځل له چاودیدونکو لاسي بمونو څخه کار واخیست.

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx