اختره راشه ! نظام کندهاری

اختره راشه دردمند زړه ته يو سکون هم راوړه

د هجر شپو لره يو څرک د سباوون هم راوړه

مــړاوي غـــوټۍ د ارمــانـونـو بيا را وټــوکــــــوه

زمونږ جل وهليو زړو ته بيا نوی ژوندون هم راوړه

چې رڼې اوښکي يې لا زانګي د بڼو په ټال کې

تحفه د صـــبر د يتيم ماشوم محزون هم راوړه

راوړه ډېوې د خوشحالۍ دردونه يوسه رانه

دې غمزده كلي ته داسي يو بدلون هم راوړه

د غمو ترنځي مو سپوږمۍ د زړونو ونېوله

راوړه رڼا اختره ژر راځه خلاصون هم راوړه

د خـپـلــواکـۍ لــيلا به څــو لا مـــروره ګــــرځي؟

نن يې پخولا کړه د زړګي مراد د مجنون هم راوړه

قـــلـــمـــه تــه هـــم هـمـيشه لکه نظام ژړېږې

نن دي پر ژبه د خوښۍ رنګه مضمون هم راوړه

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د