غزل/ فتحان حنفي

فتحان حنفي

د تل په څیر دي بیا عجیبه وکړه
سخته دوکه دي نن رقیبه وکړه

رانه دي وړی دي لمرمخی ګلاب
عجیبه لوبه دي نصیبه وکړه

د سهار لمونځ یې د عشا په اودس
ما یې پوښتنه له قریبه وکړه

د بڼ ګلونه یې دي مړاوي مړاوي
پرې خاص نظر ګرانه حبیبه! وکړه

لکه د لمر په شاني وځلیدي
د مرګ حمله پرې بدنصیبه وکړه

یمه رنځور د رنځ دوا لټوم
زما درملنه اې! طبیبه وکړه

په غم یې لیکي څو کړۍ د شعر
فتحان هم زدکړه له ادیبه وکړه