کور پاڼه / ورزش / ښايي پر شفیق الله شفق لګیدلی بندیز نور هم وغځول شي

ښايي پر شفیق الله شفق لګیدلی بندیز نور هم وغځول شي

نن ټکی اسیا (سه شنبه، وږي ۹مه ۱۳۹۵ل): د افغانستان کرکيټ بورډ وايي چې د ملي کرکيټ لوبډلې پر وتلي لوبغاړي شفیق الله شفق باندې لګیدلی بندیز ښايي نور هم وغځول شي.

کرکیټ بورډ څه موده وړاندې شفیق الله شفق له دې کبله د شپږو میاشتو لپاره له هر ډول لوبو څخه کینولو. کرکيټ بورډ ادعا کوله چې شفق د نړیوال جام پر مهال یو شمېر سرغړونې کړي دي او دوی له همدې کبله مجازات کړی دی.

د کرکيټ بورډ ویاند فرید هوتک اوس تازه یوې رسنۍ ته ویلي چې شفیق الله شفق د شپږ میاشتېني بندیز د اصولو څخه سرغړونه کړې او ښايي د کرکيټ بورډ ځانګړې کمېټه پر نوموړي لګیدلي بندیزونه نور هم وغځوي.

ویل کیږي چې شفیق الله شفق د شپږیزې د پیلېدو وړاندې د حمید حسن، هستي ګل عابد، بختیار ساحل سره یوځای د مشرانو جرګې مشر فضل هادي مسلمیار او د ننګرهار والي سلیم کندوزي سره کتلي وو.

شفق وايي چې کرکیټ بورډ له دې کبله پر نوموړي لګیدلی بندیز غځوي چې نوموړي له یو شمېر سیاسي مشرانو سره کتلي دي.


د نن ټکی اسیا موبایل اپلیکیشن دلته کښته کړئ