کور پاڼه / خبرونه / نړۍ / د کمو مرستو سربېره پاکستان د میلیونونو افغان مهاجرینو کوربه دی

د کمو مرستو سربېره پاکستان د میلیونونو افغان مهاجرینو کوربه دی

نن ټکی اسیا (سه شنبه، وږي۳۰مه ۱۳۹۵ل): د پاکستان لومړي وزیر نواز شریف ویلي چې که څه هم نړیواله ټولنه د مهاجرینو اړوند پاکستان ته خورا کمې مرستې کوي خو سربېره پر دې یې هېواد د تېرو څلورو لسیزو را په دېخوا د مېلیونونو افغان مهاجرینو مېلمه دی.

د مهاجرینو په اړه د ملګرو ملتونو عمومي شورا ته په خبرو کې نوازشریف زیاته کړله: «د نړیوالې ټولنې مالي مرستې کمې شوي خو د پاکستان مېلمه پالنه کې هېڅ کمی نه دی راغلی».

هغه وویل چې دوی که څه هم منابع کم لري خو د پاکستان ولس خپل زړونه افغان ورورنو او خوېندو ته خلاص کړل.

نواز شریف په وینا پاکستان په عزت سره د افغان مهاجرینو د بېرته ستنېدنې بهیر ملاتړ کوي او له نړیوالې ټولنې غوښتنه کوي چې د مهاجرینو په ځای پر ځای کولو کې مرسته وکړي.

د نوموړي په باور خلک د غریبۍ، جنګونو یا شخړو له کبله هجرت ته مجبوریږي، په نړۍ کې د مهاجرینو شمېر زیاتیږي چې ورسره د مرستې او مینې اړتیا ده.

نوازشریف دغه څرګندونې په داسې حال کې کوي چې په دې وروستیو کې په ځانګړي ډول په خیبرپښتونخوا کې د افغان مهاجرینو ځورونې خورا زور اخېستی او په یو شمېر سیمو کې په زور افغان مهاجرین وتلو ته اړ کړل شوي دي.


د نن ټکی اسیا موبایل اپلیکیشن دلته کښته کړئ