پاکستان د ګډحکومت او حزب اسلامي تر منځ د سولې هرکلی کړی

نن ټکی اسیا (دوشنبه، تلې ۵مه ۱۳۹۵ل): پاکستان د ګډحکومت او حزب تر منځ  د سولې هوکړه لیک د لاسليکیدو هرکلی کړی دی.

د پاکستان د بهرنیو چارو وزارت ویاند نفیس زکریا ویلي چې پاکستان په افغانستان کې امن غواړي او افغان ولس د سولې او خوشحالۍ حقدار دي.

هغه ویلي چې پاکستان د ګډحکومت او حکمتیار تر منځ د سولې د هوکړه لیک هرکلی کوي.

د نفیس زکریا په باور پاکستان په افغانستان کې د امن او ثبات لپاره هڅې کوي او د افغانستان د ټولو مشرانو چې د امن لپاره کوښښونه کوي، دوی یې ملاتړ کوي.

هغه وویل چې په افغانستان کې امن نه یواځې د سیمې بلکې د پاکستان لپاره هم ګټور دی.

تر دې وړاندې امریکا، برتانیې او ایران هم د حزب اسلامي سره د سولې هوکړه لیک هرکلی کړی و.

د یادونې وړ ده چې د روان کال د ستمبر د میاشتې په ۲۲مه نېټه د حکومت او حزب اسلامي تر منځ د سولې هوکړه لیک لاسلیک شو.