کور پاڼه / پښــــتو ادب / شعـــــرونه / یوڅوک/ رفیع الله اتل

یوڅوک/ رفیع الله اتل

رفیع الله اتل

د پوري کلي پر بدرنګو خپل اختیار پلوري
ازاد ژوندون، کلی، ګودر او هم چینار پلوري

ښکلا،زینت،حیاء ته ژمن تر پایه پاته نه شو
اوس په بدرنګو ښامارانو خپل کردار پلوري

د تروږمیو مین بیا ښار ته سودا پسي ځي
پر تور ماښام راته ویاړلی سپین سهار پلوري

دډیري ستري قافیلې چاري په غاړه واخلي
اوس د ویاړلي قافیلې ها دروند مهار پلوري

د شنو ډالرو مینه شوه پر ډیرو زړو غالبه
د لاس ټوپک د زړه توحید د خُلې اقرار پلوري

ولسه! دا هم د تاریخ پر پاڼي لیک وساتئ
په شنو ډالرو ورته ګوند او هم سالار پلوري

دا بنګلې، موټر، پيسې دومره عادي مه ګڼئ
د دې بدله کښي نن د ګران غازي مزار پلوري

د غرو سرو کي چي یې تل د کمینو دندي وې
د واک په شوق کښي د راکيټو کړنګهار پلوري

اتل حیران دی چي سیاف او رباني چا خپل کړ
چي ځان په ویښه پر غربیانو حکمتیار پلوري


د نن ټکی اسیا موبایل اپلیکیشن دلته کښته کړئ