کور پاڼه / خبرونه / افغانستان / دولتي چارواکي وايي طالبان يې د کندوز له مرکزي برخو په شا تمبولي

دولتي چارواکي وايي طالبان يې د کندوز له مرکزي برخو په شا تمبولي

نن ټکی اسیا (سه شنبه، تلې ۱۳مه ۱۳۹۵): ناټو ځواکونه او سیمه‌ییز دولتي پولیس وايي چې د کندوز ستراتيژیک ښار څخه یې طالبان پر شا تمبولي او ښار یې یو ځل بیا نېولی دی.

طالبانو پرون مازدیګر د کندوز ښار نېږدې ټولې برخې ونېولې، د دغه ښار په مرکزي څلور لاري یې خپل سپین بیرغ پورته کړ.

اوس تازه د کندوز امنیه قومندان محمد قسیم جنګل باغ ادعا کړې چې د کندوز ښار مرکز د دوی په لاس کې دی او اوس د ناحیو په تصفیه کولو بوخت دي.

په عین حال کې د ناټو پرېکنده ماموریت هم ویلي چې دولتي ځواکونو د کندوز ښار نېولی او د تازه دمي ځواکونه کندوز ته پر لاره دي.

بل لوري ته بیا رویټرز خبري اژانس د سیمه‌ییزو چارواکو له قوله لیکلي چې د امنیه قومندانۍ او ملي امنیت مدیریت سره جګړه روانه ده.

د کندز ولایتي شورا غړی «امر الدین ولي» هم تایید کړې چې په دې ولایت کې یوازې څو محدودې دولتي ودانۍ د دولت په واک کې دي او په پاتې ټول ښار طالبان حاکم دي.

طالبانو ویاند ذبیح الله مجاهد ویلي چې د کندوز د والي په دفتر يې بریدونه پيل کړي، یوه مهمه امنيتي پوسته يې نېولې، د دوی ځواکونه پرمختګ کوي او والی هوايي میدان ته تښتیدلی دی.


د نن ټکی اسیا موبایل اپلیکیشن دلته کښته کړئ