افغانستان
په افغانستان کې د بیان ازادي د نشت برابر ده
د افغان ژورنالیستانو د اتحاديې مشر احمد قریشي نن په کابل کې ژورنالیستانو ته په يوه خبري غونډه کې ويل؛ چې د تېرو دولسو کلونو په تېریدو افغانستان کې د بیان ازداي نوره هم محکومه شوې ده. ښاغلي قریشي زیاته کړه چې د تېرو شلو کالو په ترڅ کې ۳۹ ژورنالیستان وژل شوي دي. په دوی ۲۳ تنه د هدفي وژنو ښکار شوي او ۱۶ تنه نور يې په وسلوالو جګړو کې وژل شوي دي. دا په داسې حال کې چې په افغانستان د امریکا او ايتلافیانو له بریده وروسته په هيواد کې د رسنيو شمېر ډېر شوی چې ورسره د ژورنالیستانو مرګه ژوبله هم د پخوا په پرتله ډېره شوې ده.
قریشي زیاته کړه چې په افغانستان کې د ژورنالیستانو وژنه يو فرهنګ ګرځيدلی؛ له همدې امله موږ غواړو چې د ژورنالیستانو قاتلین باید محاکمه شي.
په عین حال کې د افغانستان د ازادو رسینو د مرکز مشر وحيدالله توحيدي وویل چې د ژورنالیستانو وژونکو ته باید سزا ورکړای شي. توحيدي د افغان ژورنالیستانو د ژوند په اړه خپله انديښنه څرګنده کړه، چې تر اوسه په لسګونو ژورنالیستان وژل شوي او حکومت يې د وژونکو د نيولو په اړه هيڅ اقدام نه دی کړی.
د یادونې وړ ده چې په هيواد کې ژورنالیستان د غیر مسؤولو وسلوالو او حکومتي زورواکو لخوا تل له جدي ستونزو سره مخ دي.
