کور پاڼه / خبرونه / افغانستان / فراه: طالبانو د مرکز په لوري نور پرمختګ کړی

فراه: طالبانو د مرکز په لوري نور پرمختګ کړی

نن ټکی اسیا (جمعه، تلې ۱۶مه ۱۳۹۵ل): د فراه ولایت مرکز چې د ځايي چارواکو په وینا د څو ورځو څخه د طالبانو تر تهدید لاندي دی، طالبانو په مرکز کې دننه د نوبهار په سیمه کې نوی پرمختګ کړی.

د سیمي د اوسیدونکو په وینا نن سهار طالبان وتوانیدل چې د مرکز اړوند د نوبهار پر دوه لاري د امنیتي ځواکونو څخه استراتیژیکه پوسته ونیسي.

ددغه پوستې په نیولو سره او همداسي د کنسک په سیمه کې د نفوذ له امله طالبان توانیدلي چې د فراه – هرات او فراه – کابل لاره تر خپل کنټرول لاندي راولي.

د فراه ولایت امنیه قومندان توریالی عبدیاني ویلي چې ددوی ځواکونو د نوبهار د پوستې څخه تکتیکي شاتګ کړی دی.

نوموړي همداراز ویلي چې د هوايي بریدونو په ترڅ کې تر شل زیات طالبان وژل شوي دي.

بل خوا د طالبانو ویاند یوسف احمدي رسنیو ته په لیږل شوي پیغام کې ویلي چې دوی هم د مقابل اړخ شل تنه سرتیري وژلي دي او دوه زغروال موټر یې هم ورته ویجاړ کړي دي.

نوموړي د خپل اړخ د تلفاتو په اړه څه نه دي ویلي.

تېره ورځ د فراه ولایت د ولایتي شورا رئیس فرید بختور د رسنیو سره په خبرو کې ویلي وه چې طالبان د ښار په څنډو کې پر یو شمېر کلیو واکمن شوي او مرکز ته په ډېر نږدې واټن کې د جګړې لپاره تیاری نیسي.

نوموړي زیاته کړې چې طالبانو د ښار او ولسوالیو تر منځ ځیني لاري تړلي دي او هره شېبه اندیښنه شته چې پر مرکز برید وکړي.

د فراه امنیه قومندان د ولایتي شورا انديښنه بېځایه بللې وه او ویلي وه چې طالبان که پر مرکز برید وکړي نو په هدیرې به ورته بدل شي.


د نن ټکی اسیا موبایل اپلیکیشن دلته کښته کړئ