کور پاڼه / مقـــــالی او تبصرې / د اکتوبر اوومه د تور تاریخ پیلامه

د اکتوبر اوومه د تور تاریخ پیلامه

لیکنه ـ خالد منهاج

د افغانستان پر مقدسه خاوره د امريکایانو او تر څلويښتو زیاتو نورو هیوادونو یرغل د 2001م کال د اکتوبر پر اوومه نيټه له هغه وروسته پیل شو چې طالبانو د امریکایي ولس مشر جورج بوش دا اخطار ونه مانه چې د دوی مېلمه اسامه بن لادن او د هغه ملګري ورتسليم کړي او هم د ده روزنيزه کمپونه وتړي. بوش د غرمې پر یوه بجه د ټلوېزون پر سکرین را ښکاره شو او اعلان یې وکړ ، چې د امریکا پوځ زما په امر په افغانستان کې د القاعدة پر تروریسټي روزنیزه کمپونو او د طالبانو د رژیم پر پوځي تاسیساتو باندې حملې راپیل کړي دي.

طالبانو د څلور دېرش ورځني فرشي بموریو څخه وروسته کابل پرې ښاوه او غرونو ته لاړل چې د هغه ځایونو څخه یې خپل جنګ ته دوام ورکړ.

په شمال کې هم د دوی ځواکونو هله وسلې تسلیم کړې چې تاجکو او ازبکو جنګسالارانو کورونو ته د تګ لپاره د ژغورلي لاري ژمنه ورکړه ، یعني هغه ژمنه چې دغو مخکنیو دښمنانو یې د وفا اراده نه لرله.

امریکا د دې جنګ د ګټلو په نیت نه یوازي په هند سمندر کې د خپلو اوبتلونو او طیارو وړونکو بېړیو استقرار ته اړتیا لرله بلکي د پخواني کمونیسټي دولتونو لکه روسیې ، ازبکستان او تاجکستان او همداراز پاکستان ملاتړ یې هم غوښت تر څو د هغوی فضا یې استعمال کړې وای او د هغوی په هوایي ډګرونو او اډوکې یې خپل پوځیان مستقر کړي وای.

امريکا پر طالبانو او القاعدة ځواکونو باندې د خپلي اته هفته ییزه بم وریو په ترڅ کې تقريباً ټولې ورانووکې وسلې استعمال کړې ، په دې لړ کې ځیرک بمونه ، یورانیم لرونکې سرګلولې او تر ټولو ډاروونکې او ځوروونکې هم (بي ایل یو ۸۲ ډیزي کټر) ، پنځلس زره پاویزه بمونه ول.

له هماغه ورځې څخه چې امریکا پر افغانستان یرغل پیل کړ د افغانانو ټولوژنه ټکونه ، تعذیب ، فقر ، غربت او د استقلال بایلل پیل شول ، افغانستان په هر لحاظ د انزوا لور ته رهي شو او د افغانستان رښتني بچیان د پردویو لومو ښکار شول.

په تأسف سره چې نن پنځلس کلونه پوره شول خو افغانان لا هم د خپلواکۍ او ازادۍ خاوندان نه شول ، اشغال دوام لري او لابه دوام کوي.


یادونه: په نن ټکی اسیا کې خپرې شوي لیکنې یوازې د لیکوال خپل نظر څرګندوي، د ادارې توافق ورسره شرط نه دی. که تاسو غواړئ نن ټکي اسیا کې مو لیکنه خپره شي، اړیکه راسره ونیسئ. مننه
د نن ټکی اسیا موبایل اپلیکیشن دلته کښته کړئ