کور پاڼه / خبرونه / افغانستان / بادغیس کې ۸۰ سرحدي پولیس طالبانو ته تسلیم شوي

بادغیس کې ۸۰ سرحدي پولیس طالبانو ته تسلیم شوي

نن ټکی اسیا (شنبه، تلې ۱۷مه ۱۳۹۵ل): د بادغیس سیمه‌ییز چارواکي وايي چې په بادغیس کې د قومندان په شمول لسګونه سرحدي پولیس طالبانو ته تسلیم شوي دي.

د طلوع نیوز تلویزون د یوه خبر له مخې د بادغیس په بالامرغاب ولسوالۍ کې ٨٠ تنه سرحدي پولیس د خپلو وسلو سره طالبانو ته تسلیم شوي دي. د طلوع خبریال زیاتوي چې دغه سرتیري له څلورو ورځو راهیسې محاصره وو چې د کومکي ځواکونو د نه وررسیدو په نتیجه کې بالاخره نن طالبانو ته تسلیم شول.

د بادغیس د والي ویاند خالدساپي هم دغه خبر تایید کړی خو د تسلیم شوو عسکرو شمېر یې بیا ۴۸ ښودلی دی. هغه ویلي دي چې دغه سرتیري د بالامرغاب ولسوالۍ د موریچاق کلي کې پرون /جمعه، تلې ۱۶مه/ ماښام مهال طالبانو ته تسلیم شوي دي.

نوموړي زیاته کړې چې د تېرو دوو ورځو راهیسې په دغه سیمه کې د طالبانو او سرحدي پولیسو تر منځ جګړه روانه ده چې د دغه ولایت د نظامي شورا د پریکړې له مخې بالامرغاب ولسوالۍ ته ۲۱۰ نور کومکي سرتیري ولېږل شول.

ساپي ادعا وکړله چې سیمې ته د تازه دمو سرتېرو ورتګ سره دوه سرحدي پوستې « ۴ نمبر او ۵ نمبر» چې تر دې وړاندې طالبانو نېولې وې، بېرته دولتي ځواکونو ونېولې.

د والي ویاند د معلوماتو له مخې د موریچاق کلي «قلعه پوسته» چې په هغه کې د قومندان اکبربای تر قومندانۍ لاندې ۴۸ سرحدي پولیس موجود و، نن ماښام ورسره د دولتي ځواکونو اړیکه پرې شوې ده.

ساپي منلې چې د بالامرغاب دغه سرحدي پولیس د ټولو تجهیزاتو او مهماتو سره د طالبانو سره یوځای شوي دي.

بل لوري ته د بالامرغاب سیمه‌ییز مسوولین بیا تسلیم شوي سرحدي پولیسو شمېر ۶۵ ښودلی او ویلي یې دي چې دوی د تېرو دوه ورځو راهیسې طالبانو محاصره کړي وو او نن ماښام د ټولو تجهیزاتو او مهماتو سره طالبانو ته تسلیم شول.

طالبانو هم په موریچاق ولسوالۍ کې د ۸۰ سرحدي پولیسو تسلیمیدو خبر تایید کړی دی. دوی د یوې خبرپاڼې په خپرولو سره ویلي چې د جمعې په ورځ ماښام ۶ بجې د یادې ولسوالۍ اړوند د مارچاق په سیمه کې د ترکمنستان سرحد ته څیرمه یوه مهمه قرارګاه چې له تېرو ۳ ورځو راهیسي د دوی تر کلکې محاصرې لاندې وه په بشپړه توګه ونېوله.

طالبانو زیاته کړې چې د بریدونو په پایله کې ۱۵ دولتي عسکرو ته مرګ ژوبله اوښتې او ۸۰ تنه عسکر له خپلو وسلو اومهماتو سره دوی ته تسلیم شوي.

د بالامرغاب ولسوالۍ موریچاق کلی د ترکمنستان سره سرحد لري او طالبان په کې پراخه حضور لري.

تېر کال هم طالبانو د موریچاق کلي ټولې پوستې محاصره کړې وې چې وروسته دولتي ځواکونو ځمکني او هوايي عملیات وکړل او محاصره یې ماته کړله.


د نن ټکی اسیا موبایل اپلیکیشن دلته کښته کړئ