کور پاڼه / پښــــتو ادب / شعـــــرونه / د جانان خدرخېل نوی غزل
افغان شاعر جانان خدرخېل چې څه موده وړاندې د قانوني اسنادو «پاسپورت او ويزې » پرته پاکستان ته د تګ پرمهال د خيبر ايجنسۍ په سيمه کې د پاکستاني پوځ له لوري ونيول شو، خو په پاکستان کې د ميشتو افغان کډوالو کارت « افغان سيټيزن» کارت يې درلود خو پاکستاني پوځ بيا هم ونيولو او د څو ورځو له پاره بندي کړی شو، نوموړي د خپل بند کیسه د «ديرش کسيزه خونه» تر سرليک لاندې هم کړې وه، دغه شعر يې هم د پاکستاني پوځيانو په زندان کې ليکلی.

د جانان خدرخېل نوی غزل

جانان خدرخېل

د لاهور ښار کې به کاړ وي، زه به نه یم
پاکستان به وران ویجاړ وي، زه به نه یم

پنجابیان به له غروره وي لوېدلي
جوړ کورونه به یې شاړ وي، زه به نه یم

پښتانه به لکه وروڼه یو لښکر وي
تر ډهلي پورې به لاړ وي، زه به نه یم

په اټک او په جیلم او آن په سیند به
افغاني بیرغ ولاړ وي، زه به نه یم

سپینې توري به د ستورو غوندې ځَل کا
د دوی شوبلې به کباړ وي، زه به نه یم

د خوشال روح به خوشحال وي “خدرخېله”
افغانیت به هلته ویاړ وي، زه به نه یم !!!
ــــــــــــــــــــ
لنډیکوتل/پوځي اډه


د نن ټکی اسیا موبایل اپلیکیشن دلته کښته کړئ