شعـــــرونه

د رڼا نيلی/ عرفان الله عرفاني

عرفان الله عرفاني

د اسمان  پر افق  باندې

سورشفق  دی  راخلتی

په  شفق  کې  زېري  ښکاري

خدايه  ته  يې  بختور کړې

سپوږمۍ  راغله  سپين  لباس  کې

د رڼا نيلی  يې  زين  دی

سپنې  وړانګې  يې  خورې  کړې

ووروي  د رڼا غشي

د تيارو لښکرې  ځغلي

د ماښام  کډه  پر شا ده

را ټول  کړی  يې  له  غولي

تور ټغر د ترږميو

ګوډ او مات  له  کلي  درومي

ستوري  پړک  وهي  ځلېږي

برېښوي  دوزخي  سترګې

آشر کړی  کهکشان  دی

له  ابليس  نه  ده  لار ورکه

آذانونه  د بلال  دي

انعکاس  يې  کوي  غرونه

هيبت  ناکه  انګازې  کړي

هر تکبير ملکوتي  دی

کڼوي  د تکبير کړيکه

د باطل  څپړ غوږونه

د دېوانو د کلاوو

نړېدلي  دېوالونه

د بلاوو زګېروي  خېږي

نور له  زوره  دي  لوېدلې

د موسی  امسا ده  لاس  کې

ښاماران  مو ووده  کړي

اوس  چيچل  کولی  نشي

د ساحر سِحر ناکام  شو

پاړوګر په  منډو سر دي

فرعونيان  وهي  کوکارې

عرفاني  ته  په  دې  پوه  يې؟

دا زموږ د ايمان  زور دی

خدای  د حقې  لار مل  دی

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x