غزل/ فتحان حنفي

له خپل لباسه معظم ښکارېږي
په قواره کې معتبر دی سړی

اخلي کرار او په چوکاټ کې قدم
د انسانیت د باب مظهر دی سړی

لکه عابد چې وي روژې ته خوشحال
ماته هم کټ مټ ووړ اختر دی سړی

راته څرګند شو له اشخاصو دا شخص
د بزرګانو خوږ منظر دی سړی

داسې خوږې خوږې خبري کوي
لکه ګبین لکه شکر دی سړی

له شخصیته یې وړانګې خورېږي
د پسرلي زېړ مازدیګر دی سړی

لکه په لمر چې ټول جهان ځلېږي
داسې دی موږ ته لکه لمر دی سړی

دومره محبوب دی دومره خوږ رالګي
فتحانه زما د زړګي سر دی سړی