شعـــــرونه

د پرديو له چوپړه د آزادۍ خوند

عبدالمالک همت

کله چي ما د شوروي د لاس کښېنولي حکومت له کاره لاس واخيست(په کابل کي د باختر آژانس خبريال وم) او د کوټي ښار ته مهاجر سوم لاندنی شعر مي د حضرت خوشالخان خټک رحمة الله عليه د يوه شعر په استقبال ووايه . خوشالخان خټک په خپل شعر کي د مغولو د نوکرۍ د پرېښوولو او د پښتنو په پلوي جګړې ته د وردانګلو يادونه کړې ده ، چي څو بيتونه يې دادي:

د مغل منصب مي پريښود هسي خوښ يم
لکه خلاص له لويه بنده بنديوان شي

د بازانو د کارګانو مصاف وينم
تر دامنځ به يې د وينو رود روان شي

عاقبت به خدای ظفر کا د بازانو
تار په تار به آواره واړه کارګان شي

آزادي تر پاچاهيه لا تېری کا
چي د بل تر حکم لاندي شي زندان شي

او دا هم زما شعر دی:

چي د روس چوپړ می پرېښود هسي خوښ يم
لکه خلاص چی له زندان څخه بندي سي

د بازانو او کارګانو مصاف جوړ دی
عاقبت به بريالي د باز بچي سي

شرمنده او پښيمان به هغه څوک وي
چي قانع د شوروي په مزدوري سي

هم وياړلی او سرلوړی به هغه وي
چي نن پورته د مظلوم په پلوي سي

آزادي طبيعي حق د هر انسان دی
چي دا حق ورځني سلب سي بد حالي سي

په نړۍ کي ټول د وينو توپانونه
له همدغي سر چينې څخه جاري سي

ستر علت د بدمرغيو په نړۍ کي
تجاوز پر ضعيف باندي د قوي سي

د افغان پر ننګ نن سوی تجاوز دی
د تاريخ به کله هېره دا بدي سي

که د دې ابرقدرتو دا سياست وي
فکر نه کوم چي ژر به آرامي سي

دا خطاب د افغانانو دی پردو ته
ژر قايل دي د دې ملک په خپلواکي سي

کور کالي که و افغان لره څوک غواړي
ګوښه ګير دي له چوپړه د پردي سي

که څوک غواړي چي د نام و ننګ خاوند سي
ننګه خپل د قام دي کړي چي ننګيالي سي

مبارز، انقلابي هغه څوک نه دی
چي يې کار د غريبانو قصابي سي

نه خادم د خپل ولس او خپل وطن دی
چي د خپل هيواد دښمن، دوست د پردي سي

تو لعنت دي پر دې هسي مبارز سي
چي پېشه يې د پردو غوړه مالي سي

د خپل ورور سره يې اخيستې دښمني وي
دوست په صدق او راستي د اجنبي سي

په بدل د آزادۍ د خپلي خاوري
دی راضي د خپل دښمن په باداري سي

په خدمت کي د پردو وي هسي ستړی
لکه ستړی چي آشپز په آشپزي سي

ای”همته“ خوار زبون دي هغه کس وي
مفتخر چي د پردو په غلامي سي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x