د سپرلي ورا/ عرفاني

عرفان الله عرفاني
ورا د سپرلي د غره په څنډه وينم
خزان له سيمې نه په منډه وينم

لور په لور وږم د سنځلو خپور دی
سپين شبنم پروت د ګل په ټنډه وينم

لکه غاټول ښکاري کېږدۍ پر دښتو
هر ځای رمه د شپونکي پنډه وينم

زېری راوړی د سهار نسيم دی
بوړبوکۍ بوره، سيلۍ کونډه وينم

ګلبڼ ته بيا بلبلان کډې راوړي
د بوراګانو لويه غونډه وينم

( عرفاني ) ځمه د جانان کلي ته
نن يې نزدې سم بې له خنډه وينم