ملا عبدالسلام اخند( ارشيف انځور)

د ملا سلام او د هغه د دښمن تلوسه بالآخره پوره شوه …!!

موسی فرهاد 2017-2-28

شهید مُلا عبدالسلام بریالی، د الله تعالی هغه بنده و چې همیشه یې دا تلوسه درلوده چې د خدای ج په سپیڅلي لاره کې د یو سخت زړي ظالم او متجاوز کافر له لاسه په شهادت ورسیږي . ځکه ده د خپل خالق ج او د هغه د پیغمبرص پر خبره پوره ایمان او باور درلود چې شهادت ، جنت ته د تللو تر ټولو لنډکۍ لاره ده . هغه د قرآن او حدیث په دې خبره پوره باوري وو چې له دې نه پورته درجه یوازي د انبیاء علیهم السلام کیدای شي چې یو مؤمن د خدايتعالی د فرض عین حکم د پرځای کولو په غرض د متجاوز ظالم کافر په وړاندي میدان ته د براء بن مالک او د أنس بن نضررض په څیر ور ودانګي او بیا د همغه کافر له لاسه 70 اویا زخمونه وګالي او په شهادت ورسیږي . نوموړی بریالی په خپله دې تلوسه کې په رښتیا بریالی شو .

خو بل پلو یې د دښمن تلوسه او ارمان هم نیمه خوا پاتي نشو ، د نوموړي د وژلو په موخه یرغلګرو او د هغوی نامراده ګوډاګیانو په کندوز کې د ډېرو نورو معصومو انسانانو ویني وبهولي .

دوی تلوسه درلوده چې کاش ملاسلام ووژل شي ترڅو مو خوب او ویښه په آرامه شی . له همدې ځایه ده چې د دښمن دا آرمان یې تر دې حده پوره بلل کیدای شي چې ملا سلام نور په دنیا کې نشته ، خو دا هیله يې هرو مرو نیمګړي ده چې خوب او ویښه به يې آرام شي . نه هیڅکله نه .

ځکه چې نوموړی یو سر نه و ، هغه په اصل کې د یوې داسي سرسپارلي قافلې سرلاری وو چې ټول وګړي یې د همداسي شهادت په هیله تل په دښمن پسي لالهانده ګرځي .

پیژندنه ….!! 

نوم یې عبدالسلام و خو له نامه سره یې د بریالی لقب هم ملګری کړی و. د عمر 37م کال یې په پوره کیدو و چې شهید شو. د زابل د شاه جوی ولسوالۍ د موسی زیو کلي نه یې کورنۍ د نوموړي تر پیدایښت وړاندي د هیواد شمال کندوز ته انتقال شوي او هلته یې د دشت آرچي ولسوالي په (سرفراز تپه) نومي کلي کې استوګنه غوره کړي وه. د دوو اولادونو پلار و چې دواړه یې ماشوماني وي .

لومړنۍ زدکړي یې د خپلي سیمي په شاوخوا مدرسو کې ترسره کولي چې د طالبانو اسلامي تحریک پیل شو ، نوموړی د یو کشر مجاهد په ډول ورسره ملګری شو چې له همدې امله یې درسونه نیمګړي شول.

د امریکایی اشغال پرخلاف چې د مجاهدینو چریکي تحرکات پیل شول ملاعبدالسلام اخند له همغو لومړنیو کسانو څخه وو چې د کندهار د بولدک ، ارغستان، معروف او د زابل د اتغر په سیمو کې له مجاهدینو سره ملګري شو چې په دې سیمه کې مشري د حافظ عبدالرحیم پر غاړه وه .

د ښه تقوا ، اخلاص ، زیرکتیا او په عملیاتو کې د ښه بریالیتوب له امله یې د اسلامي امارت د مشرانو توجه جلب کړه او سمدستي یې نوموړی د کندوز لپاره مسئول وټاکه . چې هلته یې په ډېر لنډ وخت کې نژدې د ټول شمال وضعیت بدل کړ . ورپسی په پاکستان کې ونیول شو او خوا وشا درې کاله یې د ډېر شدید زندان ناخوالي وګاللي. له را خلاصیدلو وروسته بیرته د مشرتابه لخوا کندوز ته مسئول شو ، د یو لنډ مهال لپاره د مزار والی شو چې د کندوز خلکو یې بیرته د ورتګ غوښتنه وکړه ، همغه وو چې کندوز یې د بهرنیو اشغالګرو او د هغوی د ګوډاګیانو لپاره سور تنور کړ .

دښمن په دې موخه چې ملاعبدالسلام اخند له منځه یوسي په سلګونو ځله د عام ولس پر کورونو او کلیو ړندي بمبارۍ وکړي چې زیات شمېر ولسي وګړي يې په شهادت ورسول . او د کابل ادارې چارواکو په وار وار ادعاوي کولي چې ګویا ملاعبدالسلام یې له منځه وړی دی . چې هرځل به هغه دروغ ثابتیدله .

تر دې چې له نن نه څلور ورځي وړاندي د دشت آرچي په سیمه کې د امریکا د بې پیلوټه الوتکي په ناڅاپي برید کې ماپښین مهال پخپل کور کې په شهادت ورسید

انالله و انا الیه راجعون . و أدخِله الی جنات النعیم .

خاطره…!

شهید ملاعبدالسلام اخند پرته له دې چې د نوموړي مبالغه آمیزه ستاینه وشي ؛ رښتیا چې له ډېرو سپیڅلیو ځانګړتیاوو څخه برخمن شخصیت و ، خورا عابد انسان و ، د ژوند زیاتره برخه یې په روژو نیولو تیریدله ، تهجد کول یې قریباً عادت ګرځیدلی و ، زړه سوی ، شفقت ، حسن سلوک ، نزاکت او ښه اخلاق یې بې مثاله وو .

د فی سبیل الله جهاد او په همدې لاره کې له شهادت سره یې بې کچي مینه درلوده ، تر دې چې په 2012م کې مو یو وخت له راډیو نه په ګډه خبرونه اوریدل وروسته یو راډیویي بحث پر دې خبره پیل شو چې امریکایان له افغانستانه وزي ، له څه اوریدلو وروسته ملاسلام اخند راډیو بنده کړه ماته یې وویل : الله تعالی دې د دې کافرانو ظالمانو مخ پرته کړي ، خدای دي پخپل طاقت سره ټوټه ټوټه او زموږ وطن دي الله ج ځینی خلاص کړي . او بل دې الله تعالی ماته د دوي په لاس شهادت نصیب کړي. دا زما یو خاص ارمان دی .

له دښمن سره د معرکې پرمهال یې ثابت قدمي او استقامت خو دا دی اوس دښمن ته هم د لمر غوندي ثابت شوی او پري معترف دی .

دا چې د نوموړي د شهادت غوښتنه همغسي قبوله شوه لکه څنګه چې یې ده هیله درلوده ؛ امید دی چې نوري دعاګاني او ارزوګاني به یې هم الله ج یو په یو قبولي او مقبولي وګرځوي . روح دي یې ښاد او فردوس جنت دي یې مأوی شي . کورنۍ ، ملګرو مجاهدینو او خپلوخپلوانو ته یې د جمیل صبر په هیله .

پای ……………………..!
2017-2-28
موسی فرهاد

تبصره وکړه

ستاسو ایمیل ادرس به هیڅ کله نشر نه شي.