مسلمانې خورکۍ ته!

صفي الله “رائد”

اې خورکۍ!

ایا پوهېږې چې د غرب وحشي تمدن تاته ستا د آزادۍ تر عنوان لاندې له تا څه غواړي؟؟!

آیا پوهیږې چې لېوان د معصومې رمې د خلاصون چغې ولې وهي؟؟؟

آیا پوهیږې چې ستا عزت او حیا په حجاب کې رانغښتې؟؟

مسلمانې خورې! د وخت او حالاتو تور تم او د غرب وحشي تمدن غواړي چې تانه ستا عزت، عفت او حیا واخلي. ستا د اسلامي پردې دنګ منار ونړوي.

ستا ښکلی اسلامي او کلتوري حجاب بې ارزښته کړي.

او غواړي تا په خپله ټولنه کې له بې قدرۍ سربېره تا بې حیثیته، بې ارزښته او عفت دې تر پښو لاندې کړي.

ګرانې خورې! مه پریږده!!! چې غربي په وحشت ککړ کلتور ستا په پاک جسم او نظر کې ښکاره او ستا د دوه ورځو ښايست ستا دنیا او آخرت له غمونو ډک کړي.

ګرانې خورې!

ستا پر ټنډه د یوې مسلمانې نوم دی، ته د یوه مسلمان پلار لور او د یوه مسلمان ورور خور یې.

باید پخپل قدر وپوهیږې او د الله تعالی په سپېڅلو احکامو کې خپل ځان ومومې.

هو! حجاب او اسلامي پرده ستا عزت او کرامت دی. ته داسې مه کوه چې خپل همدغه کرامت تر پښو لاندې کړې!

ته د غرب په اصطلاحاتو کې خپل ضمیر مه پټوه! او مه خو د غرب لنډغرو سره ځان برابروه!

ته غوره پلار او نیکه لرې، ته غوره او مسلمانه کورنۍ لرې… لنډه دا ته هر هغه څوک لرې چې ته یې تمه کولای شې او تا ته خپل عزت او عفت درکولای شي.

تاته یو ښه او له ښکلاوو ډک ژوند درکولای شي.

‌‌‌‌‌‌مهمه نه ده چې هر سړی تا باید وویني او پوه شي چې ته ظاهري حسن او ښکلا لرې، بلکې له ظاهري ښکلا تاته ستا حیا، عزت او عفت ډېر مهم دی؛ چې هغه بیا ستا په حجاب او پرده کې رانغښتی دی، نو که خپله حیا، عزت او عفت غواړې په یاد لره! چې تل باید په پرده کې واوسې!

هڅه وکړه ترڅو خپل حسن او ښایست پټ وساتې!

شاعر څه ښه وایي:

حسن چې بې ستره شي بې قدره شي
ځـکه پښـتنې مخـونه پــټ ســاتي

ګرانې! د خپل حسن بې سترۍ سره خپل ژوند او ځان مه بې قدره کوه!!!

د یوې خور ایمان او غیرت د هغې له پردې، جامې او حیا څخه ډیر ښه څرګندېږي ؛ چې ښه او درنده جامه د یوې خور دعفت او عزت ښکارندویي کوي.

زړه ته رانېږدې خورې!

دا سمه ده چې نارینه باید د خپل لید ساتنه وکړي، خو!

پام دې وي چې خویندو ته هم الله پاک په اسلامي حجاب امر کړی دی.

قال الله تعالی : وَقَرْنَ فِیْ بُیُوتِکُنَّ وَلَا تَبَرَّجْنَ تَبَرُّجَ الجَاهلِیَّةِ الاُولَی ـ

ژباړه: الله تعالی فرمایلي دي:

په خپلو کورونو کې په قرار او اطمنان سره واوسئ او د جاهلیت دمخکنۍ زمانې د رسم او رواج سره موافق مه ګرځیږئ او اظهار د زینت او ښایست مه کوئ.

په دې هکله بل ځای کې وایي:

ياايهاالنبى قل لأزواجك وبناتك ونساءالمؤمنين يدنين عليهن من جلابيبهن ذلك أدني أن يعرفن فلا يؤذين وكان الله غفورارحيما (الأحزاب 59).

اې نبي! (صلی الله علیه و سلم) ووایه! خپلو بي بیانو، خپلو لورګانو او د مومنانو ښځو ته(ووایه) چې په ځان راخپاره کړي خپل حجابونه. دا وړوکې خبره ده چې دوی وپېژندل شي او تکلیف ور ونه رسیږي، او الله تعالی بښونکی او رحم کوونکی دی.

ښه پام وکړه! الله تعالی دې په دنیا کې هم په حجاب سره له تکلیفونو او ځورونو ساتي او آخرت لپاره خو دې حجاب مهمه وسیله ده.

باید د الله احکام په عمل کې ومنې او په حجاب پیل وکړې.



یوه تبصره

  1. اطلاعات صحیح رانشرمیکند

تبصره وکړه

ستاسو ایمیل ادرس به هیڅ کله نشر نه شي.