سرخط د طالبانو والي په نوم جعلي پیغام نشر کړ

نن تکی آسیا (یکشنبه، کب ۲۹ ،۱۳۹۵ل): د ملي امنیت شورا تر سرپرستۍ لاندې خپریدونکې سرخط ورځپاڼې، چې وړاندې يې د طالب قومندان عبدالله سرحدي لخوا د ملا اختر محمد منصور د ویشتل کیدو ادعا هم کړې وه، په هلمند کې د طالبانو والي جعلي غږیز کلیپ خپور کړی.

دا غږیز کلیپ چې د نن ټکی اسیا خبري څانګې اوریدلی، په کې ویناوال په پرلپسې ډول هڅه کړې چې د طالبانو لپاره د امارت کلمه استعمال کړي. نوموړي په خپلو پنځه نیمو دقیقو خبرو کې ۱۳ ځله دغه کلمه د الف په زیادت سره په «امارات» تلفظ کړې او ژبه یې د «امارت» په کلمې نه اوړي. خو سرخط کاږي چې دا غږ د ملاعبدالمنان اخند دی.

د سرخط د کلیپ ویناوال خپلې خبرې په (اعوذبالله) پیلوي او په کندز کې د طالب والي ملاعبدالسلام اخند پر وژنې له تبصرې سمدستي وروسته د طالبانو په مشرانو او تشکیلاتي بدلون اعتراض کوي او په غنیمت کې زیاته ونډه غواړي.

د سرخط د کلیپ ویناوال ګواښ کوي چې که په غنیمت کې یې برخه معلومه نه شي ډیر ژر به خپل موقف اعلان کړي. د غږیز کلیپ له اوریدو څخه محسوسیږي چې څښتن یې خپله وینا د کاغذ له مخې اوروي.

دا په داسې حال کې ده چې د ۲۰۱۵ کال په ډیسمبر میاشت کې همدغې ورځپاڼې خبر خپور کړی و چې د وردګو ولایت لپاره د طالبانو مرستیال والي عبدالله سرحدي په خپل کور کې د طالبانو په مشر ملا اختر محمد منصور ډزې کړي او مرګ ژوبله یې رامینځته کړې. خو ورسته عبدالله سرحدي، چې سرخط یې د وژنې ادعا کړې وه، په خپل یو غږیز پیغام کې د دې پیښې رامینځته کیدل دروغ وبلل.

که څه هم تېره ورځ دغې ورځپاڼې یو ځل بیا ادعا کړې چې د غږیز کلیپ ویناوال یې د طالبانو والي ملا عبدالمنان اخند دی، خو تر اوسه د بې پرې سرچینو لخوا دغه ادعا نه ده تایید شوې.

په عین حال کې طالب چارواکو په هلمند کې خپل والي ته منسوب غږیز کلیپ «دروغ او بې اساسه» بللی او د ټولنیز رسنیو هغه فعالانو چې د نوموړي پخوانۍ غږیزې مرکې يې اوریدلي، د کلیپ د حقیقت په اړه شکوک څرګند کړي.