د ګډ حکومت ولسمشر اشرف غني

نوی کال او د ولسمشر کارملي شعارونه

زخمي افغان
اشرف غني تیره ورځ د نوي کال په مناسبت په خپره کړې وینا کې دغه کال د ده په خبره (د تروریزم د شکست) کال ونوماوه. د اشرف غني دې احساساتي شعار راته ببرک کارمل رایاد کړ چې د ولسمشر په نسبت یې غږ ډډ او شعارونه احساساتي و.

کارمل چې د ۱۳۵۸ او ۵۹ کلونو په اوږدو کې د مجاهدینو توپانې بریدونو یې د واکمنۍ ساحه تر ښارونو ورلنډه کړه نو د ۱۳۶۰ لمریز کال په رابریدو سره یې هڅه وکړه چې د شعارونو په زور خپلو عسکرو او مورال بایللو شوروي بادارانو ته روحیه ورکړي.

کارمل د دې کال په پیل کې یو رسمي شعار جوړ کړ چې ( سال شصت سال شکست ارتجاع است) یعنې ۱۳۶۹ ل کال دمجاهدینو د پوپناه کیدلو کال دی. د همدې کال په اوږدو کې کارمل او ملګرو یې پرلپسې د – سال شصت سال شکست – شعار غږاوو مګر په عملي میدان کې نه دا چې ارتجاع(!) شکست نه خوړ بلکې مجاهدین لا نور هم د ښارونو لمنو ته نږدې کیدل. څو کاله وروسته د ارتجاع(!) په ځای ارتقاء (!) شکست وخوړ او کارمل له جنرال ګروموف سره یوځای د حیرتان په لاره وتښتېد چې بیا یې مرګ هم دورې شو.
اوس اشرف غني هم ددې په ځای چې د جګړې عیني واقعیتونه تحلیل کړي د کارمل غوندې یوازې په شعارونو اکتفاء کوي، که د کارمل شعار د شصت او شکست د هموزنۍ له امله لږ په تول برابر و د اشرف غني شعار بیا له دې اړخه هم نیمګړی دی، نوموړی وایي چې ( سال نود وشش سال شکست تروریزم است) د اشرف غني له دې مات شعاره داسې معلومیږي چې جنګي اراده او پوځي مورال یې هم د کارمل په نسبت مات دی او په ډیره خوارۍ سره پیوندیږي.

که اشرف غني غواړي د جګړې په میداني وضعیت ځان پوه کړي نو د بې اساسه شعارونو په ځای دې یو ځل ددفاع وزارت هغه راپور تر نظر تیر کړي چې د تیرکال د جګړې ارقام او دوه اړخیز وضعیت بیانوي. په دې راپور کې چې تیره ورځ د دفاع وزارت ویاند دولت وزیري نشر کړ راغلي دي چې په تیر کال کې طالبانو ۲۳ زره بریدونه کړي چې دا د پخوا هر کال په نسبت لوړه شمیره ده.

لنډه دا چې شعارونه اسان او جګړه ګټل خورا سخت دي.تیز شعارونه زیاتره هغه خلک ورکوي چې په ځان کې د عمل توان نه ویني نو غواړي خپله عملي ناتواني په اورنیو شعارونو جبیره کړي.

تبصره وکړه

ستاسو ایمیل ادرس به هیڅ کله نشر نه شي.