د نن سرلیکنه

ولس د انتخاباتي کاندیدانو په ژمنو څومره اعتماد کولای شي؟ – سرمقاله

نن ټکي آسیا – سرمقاله: په هیواد کې  د ولسمشریزو ټاکنو لپاره  د نوماندانو لخوا ټاکنیز کمپاین په داسې مهال کې پیلیږي چې د هیواد په یوشمیر  ولایتونوکې ولسي خلګو د دولتي چارواکو او ولایتي شوراګانو د مسؤلینو پر خلاف  لاریونونه پیل کړي دي.

 

د دغو ولایتونو له جملې څخه یوهم  د اروزګان  ولایت دی چې  له تیرو دریو ورځوراهیسې ګڼ شمیر لاریون کوونکو د دغه ولایت د والي او ولایتي شورا د رئیس پر خلاف لاریون کړی او په ترین کوټ ښارکې د ولایت د ودانې مخته خیمې وهلې دي.

پاریدلې مظاهره چیان چې د هغوئ په منځ کې قومي مشران ، د دولتي ادارو کار کوونکي او د ښونځیو ښوونکي او زده کوونکي  هم  شامل دي ،د یاد ولایت د والي امير محمد اخندزاده او نورو لوړ پوړو دولتي چارواکو پرضد شعارونه ورکوي او هغوی پرمالي فساد، رشوت او د عامه شتمنیو پر غصبولو تورنوي .

 مظاهره چیان اد عالري چې د اروزګان والي له ولسي خلګو څخه  د قانوني کارونو د اجراء کولو په مقابل کې پیسې اخلي او له رشوت او بډو ورکولو پرته  هیچاته هم کار نه کوي.

هغوئ وايي د دوی  والي یواځې له ولسي خلګو څخه په رشوت اخیستلو بسنه نه ده کړې ،بلکي د دې ولایت د بیارغونې په نوم یې له  بهرنیو مؤسسوڅخه هم مالي امکانات اخیستي چې دوى یې په دي اړه کره اسناد هم په لاس کې لري.

یواځې روزګانیان نه بلکې د هیواد دنورو ولایتونولکه قندوز،زابل،نورستان ،قندهار،پکتیا او…. اوسیدونکي هم   دخپلو  مفسدو  والیانو او  دولتي مامورینو له فساده  سرټکوي او د هغوئ د تبدیلي  غوښتنې کوي .

په داسې حال کې چې ولس نور د مفسدو دولتي چارواکو له فساد اوبیعدالتي څخه  تر سپوږمو رسیدلی  ، هغوی داځلې بیا د  خپلو تبلیغاتي  کمپاینونو په وسیله  تري غواړي چې  د دوئ  حمایت  وکړي  او په راتلونکو ټاکنوکې  ورته خپلې رأیې ورکړي.

یاد نوماندان   په خپلو  تبلیغاتي څرګندونو کې ولس ته   ډول ډول عجیبې او غریبې  ژمنې ورکوي ، چا له ځان څخه ورته د بیارغونې بلدوزر جوړ کړی ، څوک  ورته ځان  د عدالت د تأمین قهرمان معرفي کوي  او څوک بیا  د  اداري فساد  دختمولو شعارونه  ورکوي  ، خو په حقیقت کې همدغه ټول  دروغجن  مداریان  د فساد، ناامنۍ او بیعدالتي  هغه حرفوي عاملین دي  چې  د هیڅ ډول  خیر ښیګڼې هیله  تري نشي کیدلای .

همدغه  دروغجن  مدعیان له تیرو دولسو کلونو  راهیسي  په یوه اوبل نامه  د افغانستان په سیاسي واک  مسلط ول، چې افغانستان  د دوئ تر تسلط لاندې  په فساد او درغلی کې په نړیواله کچه لومړی مقام خپل کړ.

اوس هم  هیڅ داسې تضمین نشته چې همدغه  په فساد معتادین دي  د بیا واکمنۍ  په مهال له خپل  اعتیادي خصلت (مالي او اداري  فساد) څخه لاس ونیسي  او د ولس د هوساینې لپاره دې کار وکړي .

ولس هم  په دې ښه پوهیږي  چې دغه  اعتیادي مفسدین یوهم په خپل  شخصي نفوذ نشي کولای چې  د ملت د زعامت  منصب خپل کړي ، بلکې  د هغوئ تر شا اجنبي  لاسونه دي چې غواړي د دغه ډول منفورو او مفسدو څیرو په مسلط کولو سره  د افغانستان لانجه نوره هم  اوږده او دوی  یې په خړو اوبو کې  کبان ونیسي.

د نن ټکي آسیا سرمقاله

 

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x