غزل/ سعادت کامران

 سعادت کامران

ورک شه بې ننګه بې وفایاره داڅه دي وکړل ؟
نامرده لاردي کړه جلا یاره داڅه دي وکړل ؟

تا ویَل زه به درسره یم تر منزله پوري
ای دیموکراسه بد اروا یاره داڅه دي وکړل ؟

تا زموږ په پاکوپاکو وینو باندي لوبې وکړې
خدای دي کړهیر دامریکا یاره داڅه دي وکړل ؟

زمادارمان او دمورچل قدر دي ونه کړلو
تا په ایمان وکړه سودا یاره داڅه دي وکړل ؟

بیا به دي نیسم له ګریوانه دمحشر پرمیدان
دخدای دښمنه ناروا یاره داڅه دي وکړل ؟

پرون دي دا ویل د دوو انقلابو اتل یم
نه شوې دنن نه دسبا یاره دا څه دي وکړل ؟

پلونه دي څارم (سعادت) پرځان مَیَنه یاره
ځې تاریکوته له رَڼا یاره دا څه دي وکړل !!؟