د سعودي مفتي د قطر محاصره له حکمته ډکه پرېکړه بللې

نن ټکی اسیا (دوشنبه، ۲۲ غبرګولی، ۱۳۹۶ل): په داسي وخت کې چې د امریکا د بهرنیو چارو وزیر او نور کفري هیوادونو ولسمشران او مسؤولین د روژې په میاشت کې پر قطر باندي د محاصرې کمولو خبره کوي، د سعودي مفتي اعظم «شیخ عبدالعزیز بن عبدالله آل الشیخ» مخالفه رایه لري.

نوموړي ویلي هغه خلک پر غلطه دي چې وایی د قطر محاصره ددغه هیواد ولس ته تاوان دی، بلعکس دا د هغوی د راتلونکې په ګټه دی.

د شیخ له لوري په خپور شوي بیان کې ویل شوي: « مسلمان باید له الله وویریږي، ددوی تګلاره او منهج باید د کتاب او سنت څخه دلیل ولري، باید افراط او غلطۍ په کې نه وي، د الله پر کتاب باندي د عمل باید واضحه تګلاره وي، څوک چې داسي کوي، هغه پر حق دي، او څوک چې باطل ته دعوت کوي هغه باطل دي، د نورو اقوالو او معتقداتو څخه باید لیري واوسو».

مفتي زیاته کړه: « سعودي یو اسلامي هیواد دی، هر ځای چې د خیر کار وي، دوی یې تمویلوي.. وروستی پریکړي چې سعودي او نورو دولتونو د قطر پر ضد کړي، دا اجرائیوي امور دي، د مسلمانانو مصلحت په کښي دی او خپله د قطریانو راتلونکې ته ګټور دي… دغه پریکړي پر حکمت او بصیرت ولاړي دي او ګټه یې ټولو ته ده».

نوموړي همداراز د «آل الشیخ» کورنۍ هغه فتوا چې د قطر امیر پر ضد یې ورکړې، او هغه یې خپلې کورنۍ ته منسوب نه دی بللی، ستایلی او ویلي چې څوک غواړي محمد بن عبدالوهاب کورنۍ ته ځان منسوب کړي، د هغه غوندي عمل باید وکړي.

آل الشیخ چې په سعودي کې دیني واک په لاس کې لري او آل ثاني چې په قطر کې واکمن دي، دواړه د سعودي مشهور دیني عالم محمد بن عبدالوهاب د کورنۍ او قوم څخه دي چې په سعودي او خلیجي هیوادونو کې یې ډېر احترام کیږي. په دې وروستیو کې د آل الشیخ قوم په سعودي کې د قطر امیر پر خپل قوم باندي عار بللی وو او ویلي وه چې هغه نور ددوی قبیلې ته منسوب نه دی.

د سعودي مفتي په داسي وخت کې خپل موقف څرګندوي چې د نړۍ مسلمانان د سعودي علماوو څخه د قطر د محاصرې په اړه پوښتنې کوي او په دغه سي یوه غټه شخړه کې ددوی چوپتیا د غندنې وړ بولي، خو بل لوري ته بیا نور د سعودي او امارات علماء معذور بولي ځکه چې په وینا یې د دین لپاره چې اوس څومره کار کوي، بیا به دغه لاره هم باندي بنده شي او په بندي خانو کې به د نورو مشهورو علماو په څېر بندیان شي.

د یادونې وړ ده چې تېره ورځ د سني علماو یوې ټولنې چې تر سل زیات او مختلفو هیوادونو علما په کښي ګډون لري، یوه خبرپاڼه نشر کړې وه او د قطر محاصره یې په کلکو ټکو غندلې وه.

په دغه خبرپاڼه کې داهم ویل شوي وه چې هر هغه دیني عالم چې په یادو هیوادونو کې اوسیږي او په قطر کې د مسلمانانو محاصره توجیه کوي او د مسلمانانو تر منځ د صله رحمۍ د قطعې سبب ګرځي، په شرعي لحاظ معقول دلیل نه لري او په اصل کې له خپل حکومت څخه په وېره او تاثیر کې فتوا ورکوي چې هیڅ شرعي حیثیت نه لري.