ټولنیزه برخه

راځئ چې فکر وکړو …. (۲)

محمد نذير ذبيح

انسانان پداسې حال کې چې د الله (جل جلاله) روزي خوري او د الله (جل جلاله) له نعمتونو خوند اخلي او استعمالوي یې بیا هم د الله (جل جلاله) ګناهونه څنګه کوي؟

حضرت ابراهیم بن ادهم (رحمه ا لله) ته یو کس راغلو ورته یې وویل : یا ابا اسحق زه ډېر زیات ګنهګار یم له ګناهونو څخه ځان نشم منع کولی داسې څه طریقه راته و ښایه چې له ګناهونو څخه منع شم حضرت ابراهیم بن ادهم (رحمه ا لله) ورته وویل : که چېرته پنځه کارونه کولی شي نو بیا ګناه تاته هېڅ نقصان نه کوي .

ګنهګار : راته ووایه هغه پنځه کارونه . . .

حضرت ابراهیم بن ادهم (رحمه ا لله) : لمړی دا چې کله د غوښتل چې ګناه وکوي نو د الله (جل جلاله) روزي مه خوره .

ګنهګار : نو بیا څه شی وخورم په دنیا کې خو هرشی د هغه روزي ده؟

حضرت ابراهیم بن ادهم (رحمه ا لله) : نو دا اوس څه مناسب کار دی چې د یو چا روزي خورې او بیا یې نا فرماني کوې؟

ګنهګار : نه … رښتیا چې د چا روزي خورم او بیا د هغه ګناه کوم مناسبه نه ده … ښه نو دوهم؟

ابراهیم بن ادهم (رحمه ا لله) : دوهم دا چې کله د غوښتل چې د الله (جل جلاله) نا فرماني وکوې نو د هغه په ملک کې به نه اوسې چېرته به د هغه له ملک نه بهر لاړ شې او ګناه به وکوې .

ګنهګار : دا خو له اولې نه هم سخته ده نو چې دده په ملک کې نه اوسم نو چېرته اوسېږم له مشرق نه تر مغرب پورې زمکه خو ټوله د ده ده؟

نو آیا دا څه مناسبه ده چې د یو چا په ملک کې اوسېږې او د هغه رزق خورې او بیا یې نا فرماني کوې؟

ګنهګار : نه رښتیا هم مناسبه نه ده چې د چا په ملک کې اوسېږم او د هغه نا فرماني کوم … ښه نو دریم ؟

ابراهیم بن ادهم (رحمه ا لله) : دریم دا چې کله د ګناه کوله نو داسې ځای ته ځه چې الله (جل جلاله) د ونه ویني ځکه چې د هغه رزق خورې او د هغه په ملک کې اوسېږې او هغه تا ویني ښه خبره نه ده .

ګنهګار : نو بیا به چېرته ځم الله (جل جلاله) خو مې په هرځای کې ویني؟

ابراهیم بن ادهم (رحمه ا لله) : نو چې هغه د په هرځای کې ویني تاته مناسبه ښکاره کیږي چې د هغه رزق خورې ، د هغه په ملک کې اوسېږې او بیا په داسې ځای کې ګناه کوې چې هغه تا ویني؟

ګنهګار : رښتیا هم چې الله (جل جلاله) ما ویني او زه د هغه نا فرماني کوم مناسبه نه ده ..ښه نو څلورم؟

ابراهیم بن ادهم (رحمه ا لله) : څلورم دا چې کله ملک الموت ستا د روح د اخیستلو لپاره درته راشي نو ته ورته خپل روح مه ورکوه او ورته ووایه : صبر وکوه زه اوس مرګ ته تیار نه یم … ماته وخت راکړه چې توبه وباسم او نېک عملونه وکوم بیا مې روح واخله .

ګنهګار : دا خو زما د وس کار نه دی ځکه چې ملک الموت یو ځل چاته د روح ا خیستلو لپاره راشي هغه بیا روح اخلي که د چا خوښه وي او کنه ، که څوک مرګ ته تیار وي او کنه ملک الموت وخت نه ورکوي .

ابراهیم بن ادهم (رحمه ا لله) : دا چې ته اوس ګناهونه کوې او کله چې ملک الموت راشي نو ځان هم ورڅخه نشې خلاصولی او د ځان لپاره وخت هم نشي ورڅخه اخیستلی نو دا خو ته خپله خپل نقصان وینې او ګناه کوې دا خو هم څه مناسبه نه ده …
پنځم دا چې کله د قیامت په ورځ ستا د ګناهونو له امله په تا باندې د جهنم فیصله وشي نو د جهنم پرښتې راشي تا جهنم ته بیایي ته ورسره مه ځه زور ورسره وکوه او د هغوی سره له تلو څخه انکار وکوه .

ګنهګار : د پرښتې سره څوک زور کولی شي؟ د هغه نه څوک انکار کولی شي؟ دا خو نا ممکنه ده .

حضرت ابراهیم بن ادهم (رحمه ا لله) : نو چې د چا روزې خورې ، د چا په ملک کې ګرځې ، د هغه تر نظر لاندې ګناهونه کوې ، د هغه پرښتې ته له روح ورکولو انکار نشې کولی ، د هغه پرښتو ته نشې ویلی چې ته له دوی سره جهنم ته نه ځې نو بیا ته ګناهونه کوې او د نجات څه امید درسره دی؟

هغه کس لږ چُپ وو بیا یې وویل : یا ابراهیم بن ادهم (رحمه ا لله) بس زما توبه ده ، زه د الله (جل جلاله) نه د تېرو ګناهونو بښنه غواړم او نور ګناهونه نه کوم په نیکو عملونو باندې آخته شو تردې چې وفات شو .

او توبه هغه شی دی چې انسان یې تر ګناه وروسته وکوي رسول الله (صلی الله علیه وسلم) فرمايي چې هغه داسې شي لکه بالکل ګناه یې چې نه وي کړې …

راځئ چې پدې مبارکو شپو او ورځو کې د الله (جل جلاله) په دربار کې خپل د توبې سر ښکته کړو د تېرو ګناهونو په اړه ورڅخه بښنه وغواړو او په راتلونکي کې د نه کولو عزم وکوو او که بیا راڅخه ګناه وشي بیا به توبه وباسو الله (جل جلاله) یې بیا هم قبلوي الله (جل جلاله) د ماته او زما ټولو لوستونکو ته د قبولې توبې توفیق را په برخه کړي .

ورته لیکنې

ګډون وکړئ
خبرتیا غوښتل د
guest
1 Comment
زړو
نویو ډیرو خوښو شویو
Inline Feedbacks
ټولې تبصرې کتل
خالداحمد انوري

ډيره زياته مننه الهې کريم دې تاسې نور هم توفیق درکړي ترځو خپلو مسلمانان ورونه او خوېندې داسلام لورې ته لا متوجه کړئ.

Back to top button
1
0
ستاسو نظر مونږ ته دقدر وړ دی، راسره شریک یې کړئx
()
x