قطرۍ ورځپاڼه: پشوګۍ چې هر څومره وپړسیږي، زمری نه جوړیږي

نن ټکی اسیا (یکشنبه، ۱۱ چنګاښ ۱۳۹۶ل): د قطر سره د شخړې د حل لپاره د څلورو هیوادونو د غوښتنو د منلو لپاره قطر یوازي یوه ورځ بله لري خو د قطر ورځپاڼې لیکلي: «قطر د هیڅ چا شرطونه نه شي منلای… که پشوګۍ هر څومره وپړسیږي، زمری نه شي جوړیدای».

باید وویل شي چې د قطر بهرنیو چارو وزیر په واشنګټن کې رسنیو ته وویل چې قطر مذاکراتو ته تیار دی خو چې د مذاکراتو په ایجنډا کې د بحث وړ غوښتنې وي.

نوموړي زیاته کړه چې اوسني ۱۳ شرطونه چې څلورو هیوادونو وړاندي کړي، په منلو خو لیري خبره ده ، په مذاکراتو هم نه ارزي.

باید وویل شي چې سعودي، امارات، بحرین او مصر پر قطر هر اړخیز بندیزونه ولګول او دیپلوماتیکي اړیکې يې ورسره پرې کړي.

څلور هیوادونو د بندیزونو شل ورځې وروسته قطر ته د کویټ له لاري ۱۳ غوښتنې ولیږلې چې رسنیو ته را ووتلې، په دغه غوښتنو کې د الجزیره تلویزون بندول، د ایران سره دیپلوماتیکي اړیکې کمول، د ترکیې پوځيان بیرته شړل، څلورو هیوادونو ته مطلوب اشخاص سپارل او د هغو ډلو سره اړیکې پرې کول چې امریکا او څلور هیوادونه یې په تروریزم تورنوي چې په هغو کې اخوان المسلمین او حماس ډله هم راځي.

باید وویل شي چې د ښکېلو اړخونو له لوري یو د بل پر ضد رسنیزه جګړه په پوره شدت سره روانه ده او هر لوری یو د بل پر ضد د توندو نیوکو څخه ډډه نه کوي چې له امله یې دغه شخړه نور هم عمق اخلي.