fbpx

په لوړه کچه د اړيکو سربېره د پاکستان او افغانستان اړيکې ترينګلې دي

نن ټکی اسیا (دوشنبه، چنګاښ ۱۹مه ۱۳۹۶ل): له تېرو څو کلونو راهيسې، چې د افغانستان او پاکستان اړيکې ورځ تر بلې مخ پر خرابیدو وې، تېره اوونۍ د امریکايي سناتورانو پلاوي اسلام اباد او کابل ته سفرونه وکړل، د امريکا او دغو دواړو هېوادونو په خپلمنځي همکارۍ يې ټينګار وکړ او پرېکړه يې وکړه، چې پاکستاني او افغان پوځيان به د ډيورنډ کرښې په اوږدو کې د مخالفينو پر ضد عمليات کوي او ارګ هم ورسره ومنله، خو لا هم د دواړو هېوادونو ترمنځ د باور فضا نه ده رامنځته شوې او نه يې هم پر يو بل له تورونو لګولو لاس اخيستی دی.

د ارګ يوه وياند نجیب الله ازاد ويلي، چې افغان حکومت د امریکا هغه غوښتنه منلې، چې د ډيورنډ کرښې په اوږدو کې به د پاکستاني او افغان طالبانو پر ضد ګډ عمليات کوي او امریکا به يې څارنه کوي، خو د نجيب ازاد په وينا پاکستان ويلي، چې په خپله خاوره کې د عملياتو پر مهال د امریکايي پوځيانو څارنه ورته د منلو وړ نه ده.

د ولسمشرۍ ماڼۍ يوه بل وياند دواخان مینه پال هم په خپلو تازه څرګندونو کې ويلي، چې ټوله نړۍ پوهېږي، چې پاکستان د طالبانو مرسته کوي او د مخالفينو خوندي مرکزونه په دغه هېواد کې دي.

خو پاکستان تل دغه تورونه رد کړي او وايي، چې د هېڅ وسله‌والې ډلې ملاتړ کوي، په قبايلي سيمو کې يې د طالبانو مرکزونه له منځه وړي او ټينګار کوي، چې د طالبانو د اولې، دويمې او درېمې درجې ټول مشران افغانستان ته ستانه شوي دي.

د پاکستان لومړي وزير نواز شريف هم د ملي امنيت شورا په وروستۍ غونډه کې ويلي، چې افغانستان کې د سولې د پروسې مرسته کوي، خو افغان حکومت هم بايد پر پاکستان د تورونو لګولو پر ځای خپل کارونه سم کړي او له خپل لاسه وتلې سيمې له طالبانو په خپله خلاصې کړي.

د نواز شريف د بهرنيو اړيکو سلاکار سرتاج عزيز هم د افغان حکومت تورونه رد کړي او وايي، چې د افغان جګړې تر ټولو ستر لامل د افغان حکومت داخلي ستونزه ده او بايد پر پاکستان د تورونو لګولو پر ځای يې په خپله حل کړي.

دی وايي: «کابل کې همدا رواج دی، چې هر څه ور پېښ شي، ژر يې تور پر پاکستان ولګوي.»

سرتاج عزيز د امریکايي سناتورانو په منځګړيتوب د ګډو عملياتو هوکړې ته په اشارې وويل، چې هېواد يې د باور فضا جوړولو په موخه له افغانستان سره په نوو لارو چارو فکر کوي او بايد د دواړو هېوادونو تر منځ روانه بې باوري او تاوتريخوالی له منځه ولاړ شي.

خو ډېری کارپوهان په دې باور دي، چې د ټولو هڅو سربېره هم د کابل او اسلام اباد اړيکو کې کوم مثبت پرمختګ نه دی شوی.

کابل کې د پاکستان پخوانی سفير رستم شاه مومند وايي، چې افغانستان کې د سولې راوستو لپاره بايد د تورونو لګولو پر ځای د جګړې رښتيني لاملونه په ګوته شي او له منځه يووړل شي.

د رستم شاه مومند په باور خبره يوازې په تورونو نه حل کېږي، بلکې د قضيې اصلي اړخ، چې امریکا، طالبان او ورسره افغان حکومت دی، بايد مخامخ سره کيني او د ستونزې مرکز په ګوته کړي او بيا يې د له منځه وړلو لپاره عملي ګامونه پورته کړي.

د چارو کارپوهان وايي، افغانستان کې د سولې او پخلاينې لپاره د امریکا، پاکستان او افغانستان د خپلمنځي همکارۍ سربېره د روانې شخړې په اصلي موضوع خبره په کار ده، چې طالبانو ولې ټوپک ته لاس کړی، غوښتنې يې څه دي او په کومه طریقه دغه ستونزه حل کېدای شي.

avatar
  ګډون وکړئ  
خبرتیا غوښتل د